Í haust hefur ákveðinn hópur nemenda í 1. - 4. bekk verið á valnámskeiði hjá Albertu G. Guðbjartsdóttur og Snorra S. Jónssyni, starfsmönnum dægradvalar, en valnámskeiðið er hluti af frístund nemenda á milli kl. 11 og 12 á daginn. Verkefnin hafa verið fjölbreytt s.s. spil, bingó, tafl, föndur, teikning og málun. Einnig hefur hópurinn farið í heimsóknir í hin ýmsu fyrirtæki og stofnanir í bænum.

Það hefur greinilega verið mjög gaman á þessu valnámskeiði eins og sjá má í meðfylgjandi myndbandi. 

Starfsfólk Grunnskólans á Ísafirði óskar nemendum sínum, fjölskyldum þeirra og öðrum velunnurum gleðilegrar jólahátíðar og farsældar á komandi ári.

Kennsla hefst á nýju ári þriðjudaginn 7. janúar kl. 8:00.

Á morgun, fimmtudaginn 19. desember, er svokallaður skreytingardagur hér í skólanum. Þá ljúka nemendur við að skreyta og ganga frá bekkjarstofum sínum fyrir litlu jólin og koma öllu í hátíðlegan búning. Viðveran hjá 1. - 4. bekk er eins og venjulega frá 8 - 14, en eldri nemendur verða búnir kl. 13:00. Mötuneytið verður opið í síðasta sinn á þessu ári.

Á föstudaginn verða svo litlu jólin haldin hátíðleg. Þá mæta allir prúðbúnir kl. 9:00 og mæta í sínar bekkjarstofur. Þar verður hátíðleg stund, en auk þess verður gengið í kringum jólatréð samkvæmt venju og einhverjir rauðklæddir sveinar kíkja í heimsókn. Skóladegi lýkur kl. 12:00 og fer strætó kl. 12:10. Dægradvöl er opin frá kl. 12:00 - 16:00 og þar með hefst jólaleyfi nemenda.

Kennsla hefst aftur þriðjudaginn 7. janúar 2014 samkvæmt stundaskrá.

Nemendur 5. - 7. bekkjar nutu söngsins

« 1 af 4 »

Í morgun fengu nemendur góða heimsókn, þegar tveir kórar Tónlistarskóla Ísafjarðar stigu á stokk og sungu nokkur jólalög undir stjórn Bjarneyjar Ingibjargar Gunnlaugsdóttur við undirleik Péturs Ernis Svavarssonar. Yngri kórinn er skipaður nemendum úr 1. - 4. bekk G.Í. og sá eldri nemendum 5. - 7. bekkjar og eru kóræfingar hluti af valgreinum nemenda hér í skólanum.

Áheyrendur kunnu vel að meta þessa heimsókn og þökkum við kórunum kærlega fyrir þetta skemmtilega framlag. Hér er hægt að nálgast upptöku frá tónleikunum.

Þröstur Jóhannesson með nýútkomna bók sína. (Mynd: www.vf.is)

Í morgun kom rithöfundurinn Þröstur Jóhannesson og bauð 5. - 7. bekk upp á upplestur úr nýútkominni bók sinni ,,Sagan af Jóa". Sagan fjallar um hinn 11 ára gamla Jóa, sem er með mjög ríkt ímyndunarafl. Í huga hans flýgur sjóræningjaskipið Algata og er förinni heitið til London að bjarga pabba Jóa úr ógöngum. Í raunveruleikanum hefur Jói tekið afdrifaríka ákvörðun sem dregur dilk á eftir sér og ekki skánar ástandið þegar raunveruleikinn og hinn ímyndaði sjóræningjaheimur fara að renna saman í eitt. Allt virðist stefna í óefni og Jói veltir fyrir sér hvort sjóræningjum sé yfir höfuð treystandi.

Nemendur kunnu vel að meta upplestur höfundar og kunnum við honum kærar þakkir fyrir.

Þess má til gamans geta að Pétur Guðmundsson, myndmenntakennari við skólann, myndskreytti bókina eins og honum er einum lagið.

Það er ýmislegt hægt að gera núna í svartasta skammdeginu annað en að grúfa yfir bókarskruddum. Í vikunni fór 1. bekkur upp í Jónsgarð, hitaði sér kakó yfir eldi og átti þar notalega stund. Krakkarnir hengdu ljósluktir á greinarnar til að skapa notalega stemningu og tókst það svo sannarlega.  Á meðan vatnið hitnaði voru margir snjókarlar sem lifnuðu við og í bakaleiðinni renndu krakkarnir sér nokkrar ferðir á stórum hól og höfðu gaman af.

Jólatré fyrri tíma

7.HS að sýningu lokinni

« 1 af 2 »

Þessa dagana er nemendum skólans boðið á jólasýningu í Safnahúsinu á Ísafirði. Þar kynnir Jóna Símonía Bjarnadóttir, sagnfræðingur, jólahald á Íslandi á 5. tug síðustu aldar. Sýningin ber yfirskriftina Í hátíðarskapi og er samstarfsverkefni  Byggðasafns Vestfjarða, Bæjar- og héraðsbókasafnsins, Ljósmyndasafnsins á Ísafirði, Héraðsskjalasafnsins á Ísafirði og Listasafns Ísafjarðar.

Í morgun þáði 7.HS boðið og var margt sem kom nemendum á óvart varðandi jólahald fyrri ára. Krakkarnir voru sammála um það að við hefðum það gott í dag og býsna margt sem við megum þakka fyrir.

Núna í tveimur síðustu vikunum fyrir jól er mikil gleði í íþróttatímunum. Tarzan tekur öll völd í íþróttasalnum við Austurveg og á Torfnesi, þar sem boðið er upp á hinn vinsæla Tarzanleik þar sem nemendur sveifla sér í köðlum og leika hinu ýmsu listir sínar.

Í síðasta sundtímanum fyrir jól fá svo allir nemendur að hafa sundleikföng meðferðis ef þeir kjósa svo. Skilyrði er þó að að allar fígúrur séu uppblásnar og geymdar í Sundhöllinni fyrir og eftir sundtíma til að einfalda krökkunum skipulagið og utanumhaldið.

Það má því búast við miklu fjöri í íþróttatímunum fram að jólaleyfi.

Í vikunni fékk 3. bekkur heimsókn frá tveimur starfsmönnum slökkviliðs Ísafjarðar sem fræddu nemendur um eldvarnir og mikilvægi rýmingaráætlunar í heimahúsum. Þeir komu einnig færandi hendi því krakkarnir fóru heim með plakat af Loga og Glóð, bók um eldvarnir, sögubók um Loga og Glóð og vasaljós. Aftast í sögubókinni eru svo spurningar sem krakkarnir eiga að svara við lestur bókarinnar og skila svo til kennarans.  Þar með eru þeir þátttakendur í eldvarnagetraun sem haldin er fyrir þriðja bekk ár hvert.  Vegleg verðlaun hafa verið fyrir þá sem vinna í þessari getraun og hafa vinningshafar oft komið frá Ísafirði og vonum við að svo verði einnig núna.